Aðallvitnið horfið - Vitnaleiðslur í allan dag

Annað lykilvitni í máli sem fyrrverandi starfsmenn GT / NOrdic Construction hafa kært til lögreglu og höfða innheimtumál  vegna, er farið úr landi. Beðið var um frest á vitnaleiðslum í gær af hálfu lögmanns GT og þá fullyrt að ekki væri hætta á að vitni færu úr landi - en í gærkvöld hætti maðurinn að svara síma og í dag bárust þær fréttir að hann væri kominn úr landi.

Vitnaleiðslur hófust á hádegi í dag fyrir Héraðsdómi Austurlands vegna málsins en eitt aðalvitna málsins, starfsmaður sá er sá um að deila launaumslögum út til starfsmanna GT / Nordic Construction mætti ekki og bárust þær fréttir í dómshús að hann væri farinn úr landi. Bæði starfsmenn AFLs og yfirtrúnaðarmaður á svæðinu reyndu ítrekað í gærdag og gærkvöld að ná sambandi við manninn en hann hætti að svara síma sínum um miðjan dag í gær og í morgun virtist hann horfinn af svæðinu.

Aðrir starfsmenn hafa borið vitni í dag og stóð fyrsta vitnaðleiðslan í hátt á annan tíma en starfsmennirnir sem kært er vegna eru alls 13 að tölu. Þeir sem lokið hafa vitnisburði hafa allir staðfest fréttir heimasíðu AFLs um fyrirkomulag launagreiðslna og því að þeim hafi verið hótað brottrekstri hafi þeir ekki kvittað fyrir móttöku hærri launa en þeir fengu.

Á hinn bóginn hafa þeir ekki staðfest fyrir dómi meintra hótanir á sunnudagsmorgun er AFL hefur birt fréttir af en félagið sagði frá ´því á sunnudag að borið hefði verið fé og áfengi í mennina og þeim hótað hyrfu þeir ekki af landinu. Þetta hefur ekki verið staðfest en lögregluskýrslur vegna þess máls verða teknar í kvöld af starfsmönnum ríkislögregluembættisins.